Kökubasar var haldinn á Bóndadaginn í Firðinum.  Kökubasarinn gekk vel að vanda og var sala góð.  Hnallþórur af öllum stærðum og gerðum streymdu inn og var borðið hlaðið af gómsætum kökum. 

Kökubasarinn er mikilvægur hlekkur í fjáröflun kórsins og mun kórinn nota ágóða hans til söngferðar til Hafnar í Hornafirði nú í vor en Landsmót íslenskra kvennakóra er haldið þar í 7. sinn.

Nú eru æfingar hafnar hjá kórnum og var fyrsta æfingin mánudagskvöldið 7. janúar kl. 20.  Það var mikil gleði í konum þegar þær hittust aftur og mikil stemning fyrir vorinu.  Næsta stefna er á æfingarbúðir aðra helgina í febrúar sem verða að Laugum í Sælingsdal.  Í vor eru á dagskrá tvennir tónleikar í apríl þeir fyrri fimmtudaginn 17. apríl og seinni laugardaginn 19. apríl.  Í lok mánaðarins verður svo farið á Landsmót íslenskra kvennakóra sem haldið er á Höfn í Hornafirði. 

Þetta er heil helgi þar sem konur munu fá að svala söngþorsta sínum og það er ekki að efa að sú ferð mun lifa í minni kórsins lengi.  Í júní verður 100 ára afmæli Hafnarfjarðarbæjar og mun kórinn taka þátt í sameiginlegum tónleikum sem haldnir verða í tilefni þess þann 1. júní sem er afmælisdagur bæjarins og upphaf Bjartra daga.