Helgina 8. - 10. febrúar var ráðgert að Kvennakórinn færi vestur að Sælingsdal í æfingarbúðir.  Vegna óveðurs sem gekk yfir landið þá var ferðinni aflýst og því urðu konur af ferðalagi vestur.  En konur dóu ekki ráðalausar og fluttu því æfingarbúðir suður í Tónlistarskóla Hafnarfjarðar.  Æft var alla helgina og var frábær vinna hjá hópnum.  Á laugardeginum var æft frá kl. 9 til klukkan 4:30.  Miklu var áorkað og voru konur glaðar í lok dags.  Hópur þeirra hressustu hittust svo um kvöldið í teiti sem boðið var til og var hlegið og sungið fram yfir miðnætti.  Klukkan 10 næsta morgun mættu konur glaðvaskar í Tónlistarskólann á æfingu og var þá æft til kl. 15:30. 

Eftir helgina voru konur ánægðar og stoltar yfir þeirri vinnu sem farið hafði fram þó að nokkur leiði hafi verið yfir því að komast ekki vestur.  En konur voru sammála um að þeim mun meiri tilhlökkun væri til ferðarinnar austur í vor.  Myndir koma fljótlega.

Stjórnin kallaði saman félagsfund fimmtudagskvöldið 29. janúar kl. 19.  Fundarefni var starf vetrarins.  Rætt var um ferðina austur á Hornafjörð í vor og voru konur almennt farið að hlakka mikið til þess að komast á landsmót.  Einnig var rætt um 100 ára afmæli Hafnarfjarðarbæjar og aðkomu okkar að þeim viðburði. 

Kórinn mun syngja á afmælisdag bæjarins sem er 1. júní ásamt fleiri kórum bæjarins.  Aðrir málaflokkar voru fjáröflun, mætingar og æfingaplan sem framundan er.