Kvennakórinn fór á Höfn í Hornafirði nú í lok apríl á Landsmót íslenskra kvennakóra sem þar var haldið en alls 13 kvennakórar af landinu sóttu mótið.  Þetta var einstaklega vel heppnuð ferð og komu glaðar söngkonur heim seint á sunnudagskvöldið 27. apríl.  Lagt var af stað frá Tónlistarskólanum kl. 10 á föstudagsmorgun og dagurinn notaður í að keyra til Hafnar en eins og fyrr sá Þormar okkar um keyrsluna.  Við renndum í hlað kl. 17:00 og voru konur mjög glaðar að sjá Gistiheimilið Hvamm sem kórkonur komu sér vel fyrir á yfir helgina. 

Um kvöldið var mótið sett og farið í ævintýralega óvissuferð undir jökul.  Karlakór Kvennakórs Hornarfjarðar hafði undirbúið komu okkar frábærlega með varðeldi og ísilögðum kerrum fullum af guðaveigum sem konur létu ekki bjóða sér tvisvar.  Undan tindrandi berginu töfraðist svo syngjandi karlakór sem vakti mikla kátínu hjá konum. 

Fimmtudaginn 17. apríl söng kórinn á Hrafnistu helstu lög efnisskrár tónleikanna.  Tekið var vel á móti kórnum og var ekki annað að sjá en að heimilisfólk hefði gaman af.  Byrjað var á að syngja lögin eftir Hafnarfjarðarskáldið Friðrik Bjarnason og var fólk hvatt til að taka undir.  Ekki lét fólk á sér standa sérstaklega þegar Fyrr var oft í koti kátt var sungið. 

Eftir að kórinn hafði tæmt efnisskránna voru sungin nokkur aukalög.  Í lokin gaf kórinn heimilisfólki eintak af disknum Stiklur og vonar kórinn að fólk geti átt ánægjulegar stundir með okkur á fóninum. 

Kórinn þáði kaffi og konfekt fyrir söngin og hlakkar til að fá að syngja aftur fyrir heimamenn.